******************************************
ရခိုင်ပြည်နယ်၊ မင်းပြားမြို့နယ်ရေကြီးမှုအတွင်း ရေလွတ်ရာထွက်ပြေးတိမ်းရှောင်တဲ့ ဒေသခံ ၂၀ကျော် ရေထဲမျောပါ ပျောက်ဆုံးသွားတယ်လို့ ပြည်နယ်လွှတ်တော်အမတ် ဦးအောင်ဝင်းက ပြောပါတယ်။
ပြည်နယ်အတွင်း မင်းပြားနဲ့မြောက်ဦးမြို့တို့မှာ ရေကြီးမှု အဆိုးဆုံးဖြစ်ပြီး မင်းပြားမြို့နယ် ဆီးပင်ကြီးကျေးရွာမှာတော့ လူသေဆုံးတဲ့ အခြေအနေထိ ဖြစ်ပွားခဲ့တာလို့ဆိုပါတယ်။
“သူတို့ရွာတွေကနေ ရေလွတ်မယ့်နေရာကို စက်လှေသေးသေးလေးတွေနဲ့ သွားကြတယ်။ လှေလေးတွေနဲ့ ထွက်ပြေးကြတယ်။ အဲ့ဒီမှာ မင်းပြားတို့ မြောက်ဦးတို့မှာက တောင်ကျချောင်းတွေ ရှိတယ်ဗျ။ အဲ့ဒီမှာ ရေစီးကြမ်းတော့ ရေထဲမျောပါသွားကြတာရှိတယ်။ ရေစီးကြမ်းထဲမှာ မြုပ်သွားတဲ့ စက်လှေတွေလည်း ရှိတယ်။ လူ ၂၀ ကျော်လောက် သေတယ်လို့ ကျနော်တို့ သတင်းကြားတယ်။”
ဇူလိုင် ၃၀ ရက် ရခိုင်ပြည်နယ်ကို ဘင်္ဂလားပင်အော်မှာဖြစ်ပေါ်တဲ့ ကိုမန်ဆိုင်ကလုန်း မုန်တိုင်း အဖျားခတ် ၀င်ရောက်တိုက်ခတ်နေတုန်း ဖြစ်ပွားခဲ့တာပါ။
လက်ရှိ မင်းပြားမြို့ပေါ်မှာသွားလို့ လာလို့ မရအောင် ရေကြီးနေပြီး မြို့အနီးက ဆီးပင်ကြီးရွာ တရွာလုံး ရေမြုပ်နေပါတယ်။
မုန်တိုင်းတိုက်တဲ့အချိန်မိုးကြီးတာနဲ့ ပင်လယ်ဒီရေတက်တဲ့ လပြည့်နေ့တို့ တိုက်ဆိုင်နေလို့ ရေကြီးတဲ့အခြေအနေ ပိုဆိုးသွားတာဖြစ်ပြီး ရေမြုပ်နေတဲ့ရွာတွေမှာ အစားအသောက် လိုအပ်ချက်ရှိနေတယ်လို့ ပြည်နယ်အမတ်က ပြောပါတယ်။
မင်းပြားမြို့ခံ လူမှုကူညီရေး အဖွဲ့ဝင် ကိုခိုင်ဖိုးထူးကတော့ ရေအမြင့် ၁၅ ပေထိ မြင့်တက်လာကာ မင်းပြားမှာ အမြင့်ဆုံးဖြစ်တဲ့ ကျိန်းတောင်ခြေရင်း ၁ပေထိရေတက်ကြောင်း၊ ရေဘေးသင့်ပြည်သူ ၃ ထောင်ကျော်ရှိပြီး သူတို့ကို ဘေးလွှတ်ရာကို ပို့ဆောင်ဖို့ လှေတွေမလုံမလောက်ဖြစ် နေတယ်လို့ ဒီဗွီဘီကို ပြောပါတယ်။
ဒီကနေ့စစ်တွေမြို့မှာတော့ မိုးတွေရွာနေဆဲဖြစ်ပြီး မနေ့က ရေလွှမ်းခံရတဲ့ ရပ်ကွက်ထဲ မှာလည်း ရေတွေမကျသေးသလို ဘူးသီးတောင်၊ မောင်တော၊ ကျောက်တော်၊ မြောက်ဦး၊ မင်းပြား စတဲ့ မြို့နယ်တွေမှာလည်း ရေတွေကြီးနေဆဲဘဲလို့ ရခိုင်အမျိုးသားပါတီက ဦးအောင်မြတ်ကျော်က ပြောပါတယ်။
ရေကြီးမှုကြောင့် စစ်တွေမှာ အသေအပျောက်ရှိကြောင်း မသိရသေးပေမယ့် တချို့မြို့မှာ ရေတွေက ဈေးထဲဝင်ရောက်ခဲ့တဲ့အတွက် ဈေးထဲက ကုန်ပစ္စည်းတွေ ပျက်စီးဆုံးရှုံးကုန်တယ်လို့ ဆိုပါတယ်။
ကျောက်တော် – မြောက်ဦး သွားလမ်းမှာလည်း ရေတွေလွှမ်းနေတဲ့အတွက် သွားလာလို့ မရဘဲ လမ်းပန်းဆက်သွယ်ရေးတွေ ပြတ်တောက်နေပါတယ်။
သံတွဲမှာတော့ လွန်ခဲ့တဲ့ ၂ ရက် ၃ ရက်က သံတွဲချောင်းရေလျှံပြီး ရပ်ကွက် ၄၊ သမုချောင်း၊ ဂူကြီးခုန် စတဲ့ ရပ်ကွက်ထဲကို ရေတွေဝင်ရောက်ခဲ့တာမှာ ဒီကနေ့တော့ ရေကျသွားပြီလို့ သံတွဲမြို့ သိမ်ကုန်းကျောင်း တိုက်ဆရာတော် ဦးတေဇိန္ဒက မိန့်ပါတယ်။ တနေ့က လင့်သာရွာမှာ လေဆင်နှာမောင်း ၀င်တိုက်သွားတဲ့အတွက် အိမ်တလုံးပျက်စီးပြီး တရော်တောရွာမှာလည်း ကမ်းပါးပဲ့ကျအတွက် အိမ် ၄ လုံးကို ဖျက်ပြီးရွှေ့ပြောင်းခဲ့ရတယ်လို့ ဆိုပါတယ်။ ဆက်လက်ပြီး ကမ်းပါးပြိုမယ့် အခြေအနေရှိတဲ့အတွက် ကမ်းနားက နောက်ထပ်အိမ်တွေ ဖျက်ပြီး ရွှေ့ပြောင်းဖို့ မြို့နယ်အုပ်ချုပ်ရေးပိုင်းက စီစဉ်နေတယ်လို့ ဆရာတော်က မိန့်ပါတယ်။ အဲဒီရွာဟာ အိမ်ခြေ ၅၀ လောက်ရှိပြီး ဖျက်ပြောင်းရမယ့်အိမ်တွေမှာ အိမ်ကြီးအိမ်ကောင်းတွေပါ ပါဝင်တယ်လို့ ဆရာတော်က ဒီဗွီဘီကို မိန့်ကြားပါတယ်။
ဓာတ်ပုံ – Khaing Morm Twan
No comments:
Post a Comment